Menu Close

यांत्रिक पद्धतीने वस्त्र धुलाई सेवा प्रकल्पामुळे रुग्णालयीन आरोग्य सेवेचा दर्जा उंचावणार – आरोग्य मंत्री प्रकाश आबिटकर

राज्यातील ५९३ आरोग्य संस्थांमध्ये यांत्रिक पद्धतीने वस्त्र धुलाई सेवेचा शुभारंभ

मुंबई – राज्यातील ५९३ शासकीय रुग्णालयांमध्ये स्वच्छता, सुरक्षितता आणि निर्जंतुक सेवा अधिक बळकट करण्याच्या दृष्टीने सार्वजनिक आरोग्य विभागामार्फत आरोग्य व कुटुंब कल्याण मंत्री प्रकाश आबिटकर यांच्या हस्ते ‘यांत्रिक पद्धतीने वस्त्र धुलाई सेवा’ या अभिनव उपक्रमाचा शुभारंभ आज (दि. १५ ऑक्टोबर) करण्यात आला. राज्यमंत्री मेघना साकोरे बोर्डीकर तसेच राज्यातील जिल्हा व उपजिल्हा तसेच इतर आरोग्य संस्थांचे प्रतिनिधी दूरदृश्य प्रणालीद्वारे या कार्यक्रमात सहभागी झाले होते. यांत्रिक पद्धतीने वस्त्र धुलाई सेवा प्रकल्पामुळे रुग्णालयीन आरोग्य सेवेचा दर्जा उंचावणार असून, आरोग्य विभागामार्फत पुरविण्यात येणाऱ्या सर्व सेवा दर्जेदार आणि अधिक गतिमान असल्या पाहिजेत, अशी अपेक्षा आरोग्य मंत्री प्रकाश आबिटकर यांनी यावेळी व्यक्त केली.

डॉ. कादंबरी बलकवडे, आयुक्त, आरोग्य सेवा तथा संचालक, राष्ट्रीय आरोग्य अभियान, आरोग्य संचालक डॉ. नितीन अंबाडेकर, आरोग्य सेवा संचालक डॉ. विजय कंदेवाड, सहसंचालक डॉ. सुनिता गोल्हाईत तसेच आरोग्य विभागातील वरिष्ठ अधिकारी आणि कर्मचारी यावेळी उपस्थित होते.

२० जिल्हा रुग्णालये, ८ सामान्य रुग्णालये, १०५ उपजिल्हा रुग्णालये, ३७८ ग्रामीण रुग्णालये, २२ महिला रुग्णालये आणि ६० ट्रॉमा केअर युनिट्स अशा राज्यातील एकूण ५९३ आरोग्य संस्थांमध्ये यांत्रिक पद्धतीने वस्त्र धुलाई सेवेद्वारे रुग्णसेवेची गुणवत्ता उंचावली जाणार आहे. या संस्थांमध्ये मिळून सुमारे २९,३१५ खाटांची क्षमता आहे.

या प्रकल्पांतर्गत सरकारी आरोग्य संस्थांतील बेडशीट, उशांचे कव्हर, ब्लँकेट, रुग्णांचे आणि कर्मचाऱ्यांचे गणवेश, पडदे, टॉवेल आदी सर्व लिनन म्हणजेच वस्त्रांची निर्जंतुक धुलाई पूर्णतः यांत्रिक पद्धतीने केली जाणार आहे. बॅरिअर वॉशिंग टेक्नॉलॉजीचा वापर करून मानवी हस्तक्षेपाशिवाय कपडे धुतले जातील. त्यामुळे प्रत्येक रुग्णालयाला संक्रमणमुक्त आणि स्वच्छ लिनन उपलब्ध होईल. सेवेच्या सुसूत्रता आणि कार्यक्षमतेसाठी दर आठवड्याच्या प्रत्येक दिवशी वेगवेगळ्या रंगांच्या बेडशीट्स वापरण्याची प्रणाली लागू करण्यात आली आहे. सोमवार – पांढरा, मंगळवार – हिरवा, बुधवार – गुलाबी, गुरुवार – पांढरा, शुक्रवार – हिरवा, शनिवार – गुलाबी रंगाच्या बेडशिट्स रुग्णालयात वापरण्यात येणार आहेत.

या शुभारंभ कार्यक्रमाचे प्रास्ताविक आरोग्य सेवा संचालक डॉ. नितीन अंबाडेकर यांनी केले तर संचालक डॉ. विजय कंदेवाड यांनी उपस्थितांचे आभार मानले.

या प्रकल्पाची अंमलबजावणी आनंद केमिस्युटिक्स प्रायव्हेट लिमिटेड, पुणे या बाह्य खासगी संस्थेमार्फत करण्यात येत असून, संपूर्ण राज्यातील लिनन गोळा करणे, प्रतवारी करणे, निर्जंतुकीकरण करणे व वितरण करणे हे सर्व काम मानवी हस्तक्षेपाशिवाय यांत्रिक पद्धतीने केले जाणार आहे. आरोग्य विभागाने रुग्णालयीन सेवांमधील स्वच्छतेच्या निकषांना बळकट करण्याच्या उद्देशाने हा प्रकल्प राबविला आहे. या सेवेच्या माध्यमातून रुग्णांना स्वच्छ, निर्जंतुक आणि सुरक्षित लिनन उपलब्ध होणार असून, संक्रमणजन्य आजारांचा धोका मोठ्या प्रमाणावर कमी होणार आहे. आरोग्य सेवा क्षेत्रातील स्वच्छतेचा नवा अध्याय लिहिणारा हा प्रकल्प राज्याच्या कानाकोपऱ्यातील रुग्णांना आरोग्य सुरक्षेची खात्री देणारा ठरणार आहे.

यांत्रिक पद्धतीने वस्त्र धुलाई सेवा हा प्रकल्प आरोग्य सेवेतील मैलाचा दगड ठरणारा असून, राज्याच्या कानाकोपऱ्यातील गोरगरीब जनतेला याचा फायदा होणार आहे. अशा प्रकारचे प्रकल्प ही काळाची गरज असून शासनाने सामान्य नागरिक केंद्रस्थानी ठेऊन याची सुरूवात केलेली आहे. या प्रकल्पामुळे आता प्रत्येक रुग्णास स्वच्छ व निर्जंतुक असे लिनन उपलब्ध होणार आहे आणि प्रत्येक धुलाईत आरोग्याची खात्री आणि स्वच्छतेची हमी मिळणार आहे. 
***